मुगु—जुम्लामा बिगत लामो समय देखि ब्यावसायिक रुपमा स्थानीय भेडापाल्ने किसानलाई उत्साहित बनाउन प्रोत्साहन भत्ता उपलब्ध गराइएको छ । ब्यावसायिक रुपमा भेडापालन गरेर जीवन निर्बाह गर्नु सकोस भन्ने हेतुले जुम्लाका २ सय ३१ जना किसानलाई प्रोत्साहन भत्ता उपलब्ध गराइएको पशु अस्पताल तथा पशु सेवा कार्यालयका कार्यालय प्रमुख ज्ञानेन्द्र बुढथापाले बताउनु भयो । जुम्लाका कनकासुन्दरी, हिमा, सिजा, चन्दननाथ नगरपालिका लगायत आठ वटै स्थानीतहमा ५० भन्दा बढी भेडापाल्ने किसानलाई गोठालो भत्ता दिइएको बुढथापाले जानकारी दिए ।

उक्त भेडापालक किसानहरुलाई उपलब्ध गराइएको गोठालो भत्ता बाफतको रकम प्रदेश सरकारको भूमि व्यवस्था कृषि तथा सहकारी मन्त्रालय बाट ४५ लाख बजेट विनियोजन गरेको पशु अस्पताल तथा पशु सेवा कार्यालयले जनाएको छ । मन्त्रालयको कार्यविध अनुसार फर्म दर्ताको प्रमाणपत्र सहित करचुक्ता सम्बन्धी वडाको सिफारिस भई आएका तथा कार्यालय बाट भएको अनुगमनको आधारमा २ सय ३१ जना भेडापालक किसानलाई १८ हजारका दरले प्रोत्साहन स्वरुप भत्ता दिइएको कार्यालय प्रमुख बुढथापाको भनाई रहेको छ । जुम्लामा ब्याबसायिक रुपमा भेडापाल्ने किसान १ हजार भन्दा बढी रहेका छन । प्रोत्साहन भत्ता पाएपछि भेडापाल्ने किसानलाई थप उत्साह जागेको छ । समुद्री सतह देखि २५ सय मिटर उचाइका बस्तीहरुमा भेडा पाल्ने गरिएको छ । भेडालाई गर्मी मौसम भन्दा चिसो मौसम बढी उत्तम हुने किसानको भनाई छ । भेडाको उन बाट राडीपाखी बुनेर किसानले बेचेर फाइदा गर्ने गरेका छन । एक भेडाको मुल्य १८ हजार देखि २२ हजार सम्म पर्ने गरेको छ ।