काठमाडौ —जावलाखेलको सदर चिडियाखानामा कालो चितुवा (प्यान्थर) हेर्न भीड लागेको छ । इलाम बाट उद्धार गरेर ल्याइएको उक्त चितुवा अवलोकनका लागि सदर चिडियाखानामा राखिएको छ । कालो चितुवा हेर्नका लागि आगुन्तकको भीड नै लाग्न थालेको चिडिया खाना प्रमुख सत्यनारायण साहले जानकारी दिए । निख्खर कालो चितुवालाई इलामबाट उद्धार गरेर ल्याइएर चिडियाखनामा राखिएको साहको भनाई छ । चिडियाखानामा प्रथम पटक राखिएको यो कालो प्रजातिको चितुवा हेर्न घुइचो लाग्न थालेको उनको भनाई छ । चिडियाखानामा राखिएको यो कालो चितुवाले आन्तुकमा बृद्धि हुने अपेक्षा गरिएको साहले सुनाए ।
करिव १७ देखि ९० किलोग्राम तौल हुने कालो चितुवा नेपाल, भुटान, भारत, बंगलादेश, श्रीलंका, इन्डोनेसिया, भियतनाम, अफगानिस्तान र अफ्रिकामा पाइने गरेको छ । प्रमुख साहका अनुसार नेपालमा यस्तो चितुवाको संख्या निकै कम छ । मांशाहारी प्रजातिको कालो चितुवाले मृग, हरिण, बाँदर, बँदेल, दुम्सी, खरायो, चरा र अन्य ससाना जनावरको मासु खान रुचाउने प्रमुख साहको भनाई । प्रमुख साहका अनुसार यो कालो चितुवा २३ वर्ष औसत आयु हुने र यसले हरेक ३ देखि ४ महिनामा गर्भधारण गर्ने गरेको छ ।