फाइल तस्विर

मुगु —कर्णालीः कर्णाली प्रदेश सरकारले चालु आर्थिक वर्षमा तुइन विस्थापित गरेर झोलुङ्गे पुल निर्माण गर्ने नीति अनुसार तुइनको तथ्याङ्क सङ्कलन सुरु गरेको छ । प्रदेशका १० जिल्लामध्ये सात जिल्लाबाट प्राप्त विवरणअनुसार हालसम्म ५० वटा तुइन रहेको प्रदेशको भौतिक पूर्वाधार तथा सहरी विकास मन्त्रालयले जनाएको छ मन्त्रालयका सिनियर डिभिजनल इन्जिनियर रमेश सुवेदीका अनुसार प्रदेश सरकारले चालु आर्थिक वर्ष २०८२÷८३ को नीति तथा कार्यक्रममा कर्णालीलाई तुइनमुक्त प्रदेश बनाउने लक्ष्य राखेको छ।

यही योजनाअनुसार झोलुङ्गे पुल निर्माणका लागि रु १ करोड ५० लाख बजेट विनियोजन गरिएको उनले जानकारी दिए । हुम्लामा सबैभन्दा धेरै तुइन सङ्कलन गरिएको विवरणअनुसार कर्णालीका जिल्लामध्ये सबैभन्दा धेरै तुइन हुम्ला जिल्लामा १५ वटा रहेको उल्लेख छ । तीमध्ये ६ वटा तुइन कर्णाली नदीमाथि रहेका छन् । त्यसैगरी, कालीकोटमा १२ वटा, जाजरकोटमा १२ वटा, सुर्खेतमा ८ वटा,डोल्पामा ३ वटा, दैलेख र मुगुमा २÷२ वटा तुइन रहेको विवरणमा उल्लेख छ ।यद्यपि, दैलेख, जुम्ला र रुकुम पश्चिमबाट भने विवरण प्राप्त भइसकेको छैन ।प्रदेश सरकारले तुइन विस्थापन गरेर त्यसको सट्टामा सुरक्षित झोलुङ्गे पुल निर्माण गर्ने योजना अघि सारेको छ ।