खेलाडीलाई प्रोत्साहन गर्न राष्ट्रिय फुलकन्ट्याक्ट कराँते प्रतियोगीता आयोजना गरिएको हो, अध्यक्ष बुढाथोकी नेपाल फुलकन्ट्याक्ट कराँते संघको आयोजनामा प्रथम पटक काठमाडौमा राष्ट्रिय फुलकन्ट्याक्ट कराँते च्याम्पियनसिप २०८३ को भब्य रुपमा आयोजना हुदैछ । यस प्रतियोगीताको पूर्ण तयारी, उद्देश्य र भावी योजनाका बारेमा नेपाल फुलकन्ट्याक्ट कराँते संघका अध्यक्ष सुर्यबहादुर बुढाथोकीसँग गरिएको संक्षिप्त कुराकानी यस प्रकार छ ।
नेपालमा पहिलो पटक ’प्रथम राष्ट्रिय फुलकन्ट्याक्ट कराँते प्रतियोगिता २०८३ को आयोजना गर्दै हुनुहुन्छ, यसको उद्देश्य के हो ?

मुख्य उद्देश्य भनेको नेपालमा छरिएर रहेका फुलकन्ट्याक्ट कराँतेका खेलाडीहरूलाई एउटै राष्ट्रिय मञ्च प्रदान गर्नु र उनीहरूको प्रतिभालाई उजागर गर्नु हो । विगतमा विभिन्न विधा वा ब्रान्चहरूले आ–आफ्नै ढंगले प्रतियोगिता गर्दै आएका थिए। तर यस पटक हामीले सबैलाई समेटेर राष्ट्रिय स्तरको वृहत प्रतियोगिता गर्न लागेका छौँ जसले देशका लागि योग्य र दक्ष खेलाडीहरू उत्पादन गर्न मद्दत गर्नेछ । यसको अर्को उदेश्य खेलाडीलाई प्रोत्साहन र खेल जगतलाई राष्टिय तथा अन्तराष्टिय सम्म पहिचान गराउनु हो ।
प्रतियोगिताको प्राविधिक र व्यवस्थापकीय तयारी कहाँ पुग्यो? खेलाडीहरूको सहभागिता कस्तो रहनेछ ?

तयारी लगभग सकिएको छ । भोली बाट आयोजना हुदैछ । खेल मैदान (रिङ), रेफ्री तथा जजहरूको व्यवस्थापन र समन्वयका कामहरू पुरा भइसकेका छन । यस प्रतियोगितामा सातै प्रदेश, विभागीय टोलीहरू (सेना, प्रहरी, एपीएफ) र विभिन्न डोजोहरूबाट उत्कृष्ट खेलाडीहरू गरि करिव १२५ जनाको सहभागीता रहने छ ।

फुलकन्ट्याक्ट कराँतेलाई अलि बढी आक्रामक र जोखिमपूर्ण खेल मानिन्छ, खेलाडीहरूको सुरक्षा र स्वास्थ्यका लागि के–कस्ता उपायहरू अपनाउनुभएको छ ?

बाहिरबाट हेर्दा यो खेल आक्रामक देखिए पनि यसका आफ्नै कडा नियम र अनुशासनहरू हुन्छन् । तैपनि, खेलाडीको सुरक्षा हाम्रो पहिलो प्राथमिकता हो । प्रतियोगिता अवधिभर रिङ साइडमा औषधि चिकित्सक टिमको ब्याबस्था गरिने छ । खेल सुरु हुनुअघि सबै खेलाडीको अनिवार्य स्वास्थ्य परीक्षण गरिनेछ र अन्तर्राष्ट्रिय नियम अनुसार सुरक्षा कवचहरूको प्रयोगलाई कडाइ गरिनेछ ।

खेलकुदमा सधैँ आर्थिक चुनौती मुख्य विषय बन्ने गर्छ। यस प्रतियोगिताका लागि बजेटको व्यवस्थापन कसरी भइरहेको छ र सरकारी निकायबाट कस्तो सहयोग पाउनुभएको छ ?

हो, आर्थिक पाटो सधैँ चुनौतीपूर्ण र कठिन छ । अहिले आर्थिक जुटाउन अति गाह्रो छ । तर, मुख्य बजेटका लागि हामीले साथीहरु संग बिदेशमा रहेका खेलप्रेमी र कर्पोरेट निजी क्षेत्रहरु संग सहयोग मागेर यो प्रतियोगीताको आयोजना गरेका हौ । आर्थिकको कठिनाईका बाबजुद पनि हामीले पहिलो पटक यो खेल आयोजना गर्न साहस गरेका छौ ।

यो प्रथम ऐतिहासिक प्रतियोगिता सकिएपछि नेपालमा फुलकन्ट्याक्ट कराँतेको विकासका लागि संघको आगामी योजना के छ ?

यो प्रतियोगिता त एउटा सुरुवात मात्र हो। यसबाट छानिएका उत्कृष्ट खेलाडीहरूलाई हामी विशेष बन्द प्रशिक्षणमा राख्नेछौँ र आगामी अन्तर्राष्ट्रिय तथा एशियन च्याम्पियनसिपका लागि तयार गर्नेछौँ। हाम्रो आगामी योजना भनेको विद्यालय स्तरदेखि नै ’ग्रासरुट’ कार्यक्रम सुरु गर्ने, कुना–काप्चामा रहेका प्रतिभा खोज्ने र नेपाली फुलकन्ट्याक्ट कराँतेलाई विश्वस्तरमा स्थापित गराउने नै हो।

अन्तमा तपाईको केही भनाई छ ?
यस प्रतियोगीतालाई भब्य र सब्य बनाउन सबैलाई हार्दिक अपिल गर्दछु । खेलमा सहभागीताको निम्ति अनुरोध गर्दुछु । अनी खेल अनुशासन, धैर्यता र निरन्तरको मिहिनेत नै फुलकन्ट्याक्ट कराँतेको मुटु हो । यो प्रतियोगिताले नेपाली मार्सल आट्र्सको इतिहासमा नयाँ आयाम थप्ने छ भन्ने आसा गरिएको छ ।