काठमाडौं – हिन्दू नेपालीहरूको दोस्रो ठूलो चाड तिहारअन्तर्गत दोस्रो दिन आज देशभर कुकुर तिहार श्रद्धा र भक्तिभावका साथ मनाइएको छ। यस अवसरमा कुकुरलाई फूलमाला लगाइदिने, निधारमा टीका लगाउने तथा मिठामिठा परिकार खुवाएर पूजा गरिएको छ।

तिहारको दोस्रो दिन कात्तिक कृष्ण चतुर्दशीका दिन मनाइने कुकुर तिहारमा बिहानैदेखि घरघरमा कुकुरको पूजा गर्ने चलन छ। धार्मिक तथा सांस्कृतिक मान्यताअनुसार कुकुरलाई यमराजको दूत र रक्षकका रूपमा लिने गरिन्छ। कुकुरलाई मानिसको विश्वासिलो साथी, घरको सुरक्षा गर्ने जनावर तथा इमानदार प्राणीका रूपमा समेत सम्मान गरिन्छ।

कुकुर तिहारका अवसरमा घरपालुवा कुकुरसँगै सडकमा रहेका सामुदायिक तथा बेवारिसे कुकुरको समेत पूजा गरिएको छ। विभिन्न स्थानमा मानिसहरूले कुकुरको घाँटीमा सयपत्री तथा मखमली फूलको माला लगाइदिएका छन् भने निधारमा रातो टीका लगाएर मिठाई, दूध, रोटी, मासु तथा अन्य परिकार खुवाएका छन्।

धार्मिक विश्वासअनुसार कुकुर यमराजका द्वारपाल तथा दूत हुन्। यमलोकको ढोकामा कुकुरले पहरा दिने भएकाले कुकुरको पूजा गर्दा यमराज प्रसन्न हुने र अकाल मृत्यु तथा विपत्तिबाट बच्न सकिने जनविश्वास रहेको छ। हिन्दू धर्मशास्त्रमा कुकुरलाई भैरवको वाहनका रूपमा समेत उल्लेख गरिएको छ। त्यसैले कुकुरको पूजा गर्नु धार्मिक दृष्टिले महत्त्वपूर्ण मानिन्छ।